Friday, April 25, 2014

මහා වාලිම්ඹය 2 (අහඹු කොටි හමුවීම)

 ඕන්න එහෙනම් හැමෝටම ආයුබෝවන් කීවා. මීට පෙර ලිපියේ කියූ මහා වාලිම්ඹය ගැන තව තොරතුරු ටිකක් කියන්නයි මේ ලෑස්තිය.

          ඔයාල දන්නවද ඔය ලස්සන කඳු ගැටේට Friar’s Hood කියන්නෙ ඇයි කියල. ඔය සුදු මහත්වරු (සමහරවිට සුදු මහත් හොරු) ලංකාව තමන්ගෙ යටත් විජිතයක් කර ගත්තට පස්සෙ ලංකාව සිතියම් ගත කරන්න ගත්ත. එන්න ඒ කාරණය සඳහා ලංකාවේ උස් බිම් තෝරගන්න ඕනෑවෙලා තියෙනවා. ඉතින් අපේ නැගෙනහිර පලාතේ මහ ඔය පැත්තෙ යනකොට දැකල තියෙනවා මේ කඳුගැටය. ඒක උන්දැලට පෙනිල තියෙන්නෙ යඤ්ඤා කරන්නාගේ තොප්පිය වගේලු. ඉතින් ඔන්න ඔහොමයි මහා වාලිම්ඹයට “Friar’s Hood” කියන ඉංගිරිස් නම ආවේ.



            සුද්දා ඉතින් ලංකාව බ්‍රිතාන්‍ය කෙරේමට සිතියම් ගත කලාට මොකද ටික කලෙකින් මැට්‍රික් කෙරේමෙ ලෝකෙ පරසිද්ද වෙන්න පටන් ගත්තනේ. (ඒ කිවුවේ දම්වැල්, පුරුක් මිනුම් වෙනුවට මීටර්, සෙන්ටි මීටර් ආපු කාලෙ ) ඉතින් ක්‍රි.ව. 1800 ගණන් වල මේ සිතියම් ගත කිරීමට යොදා ගත් උස් කඳු මුදුන් එහෙමත් නැතිනම් මේ ත්‍රිකෝණමිතික ස්ථාන ක්‍රි.ව. 1965-1967 නැවතත් මැනල කිරල ගන්න උවමනා වෙලා. මේ කාරණයට දියතලාවෙන් මිනින්දෝරු වරු පුහුණු කරන්න UN (එක්සත් ජාතීන්ගේ සංවිධානෙන්) එකෙන් ආධාර එහෙමත් දුන්නලු. අපේ තාත්තා ඔන්න ඔය කියන රාජකාරිය කොරන්න මහා වාලිම්ඹයට ගිය හැටි තමයි දැන් කියන්නෙ යන්නෙ.

            මේ කියන තැනට යන්න නම් ලංකාවේ නැගෙනහිර පළාතේ තියෙන මහ ඔයට ගිහින් එතැන ඉඳන් අති දුෂ්කර ගමනක් ගෙවල මංගල ඔය හොයාගෙන යන්න ඕනෑ. මංගල ඔය ලඟ ඉඳන් ඉතින් පයින් තමයි. මේ කියන ගමනට ගෝල බාලයෝ හතර පස් දෙනෙකුයි, තුවක්කු කරුවෙකුයි සහභාගී වුනාලු. කෂ්ටිය ඔන්න දවල් බත්මුල්, වතුර කෑන් හෙම ජීප් රථයෙන් බාල අනෙක් අඩුම කුඩුමයි කදවල් බැඳගෙන මංගල ඔය දිගේ ගමන පිටත් වෙලා.

            ඔන්න ඉතින් ටික දුරක් යන කොට වාර්මාර්ග දෙපාර්තමේන්තුවේ මහත්වරුන්ගේ කූඩාරමක් හම්බවුනාලු. එයාල මංගල ඔයේ වතුර බහින වේගය, ධාරිතාව වගේ දේවල් සමීක්ෂණය කරන්න ආපු කට්ටියක්. එතැන ටිකක් ගිමන් නිවල ආයෙත් පිටත් වෙන්න හදන කොට, එතැන හිටපු මහත්තයෙක් කීවලු උඩහ කැලේ වාඩි බැඳල ලී ඉරන කට්ටියක් ඉන්නව දවල් කෑම ගන්න එතෙන්නට යන්න කියල. කවුරුත් දන්නෙ නැති මේ මහ කැලේ මිනිස්සු ඉන්න ඉසවුවක් හරහා යන එක කෝකටත් හොඳයි කියල අපේ පිරිස ආයෙමත් ගමන් ආරම්භ කරල. ඔය කියන ලී ඉරන වාඩිය හොයාගෙන ඔහොම යනකොට එක පාරටම මහ සද්දෙන් කැලේ බිඳෙන හඬක් ඇහෙන්න පටන් අරගෙන. මේක මේ  ලී ඉරන අයගෙ වැඩක් වෙන්නැ කියල ඉස්සරහට යන්න හදනකොට, එක පාරටම අපේ තුවක්කු රාළ ඉදිරියට පැනල ගමන හරස් කොරාලු. ඒ මදිවට කස්ටියටම උන්නු තැනින් හෙලවෙන්න එපා කියල සංඥාවකුත් දුන්නලු. කැලේ කොලේ ගැන දන්නෙ කැලේ කරග්ගහන අය නිසා අපේ අයත් මේ වෙලාවෙ ටැග්ගැහිල ඉඳල. වැඩි වෙලාවක් මෙහෙම ඉන්න ලැබිල නෑ, ඔන්න එක පාරටම මහ කැලේ බිඳගෙන අං කොට ගෝන තඩියෙක් පිරිස ඉස්සරහින් මහ සද්දෙන් දිවුවෙ නැතෑ.

අහ්! මට වේලපහ කියන්න අමතක වුනා නෙව. ඔය අපේ පිරිසට, ඉවුම් පිහුම් හෙම දන්න කියන පිරිමි කෙනෙකුත් අනිවාර්යයි. මේ වැඩේට අපේ තාත්ත තෝරං තියෙන්නෙ අපේ ගමේම හිටපු ඩයිමන් ගොයිය. මේ මනුස්සය තාත්තල පොඩි කාලෙ ඉඳල අපේ සීයලෑ ගෙවල් දොරවල් ආස්සරේ කොරාපු උයාපු පිහාපු මනුස්සයා වෙච්චි, තමන්ට කෑම බීම හදන්න ඊට වඩා විස්වාසියෙක් කොයින්දැ. කෑම බීම රසට හදනව වගේම, බෙහෙත් කොටාපු තුවක්කු බටෙත් අරං කෑම හොයාන එන්න ඕනැ කැලේකට එඩිය තියෙන මිනහ. එවගේම ඩයිමන් සීය තමා අපේ අප්පොච්චාගේ බොඩිගාඩ් වැඩෙත් කරල තියෙන්නෙ. ඩයිමන් සීය ගැන පස්සෙ ලිපි වලින් තව රස කතා කියන්න බැරුවයැ.

            ඔන්න ඉතින් ගෝන දිවුව සැනින්, ඩයිමන් සීය ඉස්සර වෙන්න හදන කොට, අපේ තුවක්කු රාළ වැලමිටෙන් ඇන්නෙ නැතෑ උන්දැගෙ බඩට. ඩයිමන් සීය හුස්ම අල්ල ගන්න බැරිව බඩ අල්ලන් පහත් වුනාලු. උන්දැත් කුකුල් කේන්ති කාරය වෙච්චි, රිටර්න් එක දෙන්න නැගිටින්න හදන කොටම අර ගෝන දිවුව දිසාවට තඩි කොටි හපුවෙකුත් හැල්මේ දීවාලු. අපේ ඩයිමන් ගොයිය හුස්ම අල්ලන් නැගිටින කොට අනෙක් අයගෙ හුස්ම නැවතිලා. ආයෙ මොන රිටර්න් ද, පරාණෙ බේරුව මදැයි කියල ඩයිමන් සීය ඉවසල ඉඳල.



            සාමාන්‍යයෙන් ගෝනෙක් දුවන විදියට හිතාගන්න පුල්වන්ලු ඌ දුවන්නෙ ඇයි කියල. විශේෂයෙන් අං නැති ගෝනෙක්. අං තියෙන ගෝනට අරියාදුවට කොටි හපුවන් කිට්ටුවෙන්න බයයිලු නෙව. කැලේ කොලේ සතා සීපාව ගැන උපාධියක් ගන්න තරම් දේවල් අපේ තුවක්කු රාළ දැනං ඉඳල තියෙනව. අපේ පිරිස නිසා කොටි රාළගේ ගමන හරස් උනානම් සමහර විට ඌ හැරිල යන්නත් ඉඩ තිබුනලු. නමුත් කොටිය කියන සතා විස්වාසෙ මදිය කියලයි කියන්නෙ. ඒක කෙසේ වෙතත් මූ ගොදුර මග ඇරුනේ මිනිස්සු නිසා පස්සෙන් පහු දවසක පහල ගම්මානෙන් නර බිල්ලක් ගන්න නොකියාම එනවලු. (සීපා කොටි ගුණම නෙවැ දෙපා කොටින්ටත් තිබිල තියෙන්නෙ.) කොටි හපුවන් මුණගැහුන තවත් සත්‍ය කතා දෙක තුනක් තියෙනවා. ඉදිරි ලිපිවලින් බලමුකෝ. තව මහා වාලිම්ඹයේ පාමුලට වත් ආවෙ නෑ නොවැ. මේ කඳුගැටේ මුදුනට ලඟාවුන සැටි ඊලඟ ලිපියෙන් කියන්නම් යාලුවනේ.

Friday, April 18, 2014

මහා වාලිම්ඹය නොහොත් Friar’s Hood

මහා වාලිම්ඹය (නොහොත් Friar’s Hood) පිළිබදව ඹබ දන්නවාද?   මාගේ මීලඟ ලිපිය මේ ගැන තොරතුරු ටිකක් ඉදිරිපත් කිරීමටයි.




             දැනට අවුරුදු තිහ හතලිහකට උඩදී  ලංකාවේ මිනින්දෝරු වරයෙක් කියන්නෙ ඉතින් නඩුකාර උන්නාන්සේ කෙනෙකු වගේ තමයි. එහෙම ලේසියෙන් කෙනෙකුට මිනින්දෝරු විභාගෙ පාස් කරන්නත් බැරිලු. ඒ වගේම හරිම ආස්වාද ජනක හා විනෝද ජනක රැකියාවක් තමයි. (ඒකට ඉතින් ආසාව තියෙන්නත් ඕනෑ.) ඒ කාලෙ ඉතින් ගෝල බාල පිරිසයි, තුවක්කු කරුයි එක්ක මිනිස් පුලුටක්වත් පය ගහපු නැති මහ වනාන්තර මැද්දෙ මැනුම් කටයුතු සහ සංතලන කටයුතු (Leveling) කරන එක තමයි ප්‍රධාන භාරදූර්‍ය රාජකාරිය වෙලා තිබිල තියෙන්නෙ. ඒකනේ වැදි ජනතාව මිනින්දෝරු වරුන්ට කැලෑ පොජ්ජ පටහරින හූරා කියල කියන්නෙ. මහ වනාන්තර මැද ඒ අය ලබපු විඳපු අත්දැකීම් අද නම් අපට මුදල් ගෙවා වත් ලබන්නට බැරි බව ඔයාල හැමෝම දන්නව නොවැ.



            ඉතින් ඹය මහා වාලිම්ඹය කියන්නේ එවගේ අතිදුෂ්කර ගමනක් ගෙවල යායුතු  බොහොම ලස්සන කදුගැටයක්. මෙම කදුගැටයේ තිබෙන එක් ප්‍රධාන වැදගත් දෙයක් තමයි, ලංකාවේ ප්‍රධාන ත්‍රිකෝණමිතික ස්තානයක් හෙවත් Trig Point එකක් මේ මත පිහිටුවා තිබීම. මේ Trig Point කියන්නෙ ලංකාව සිතියම් ගත කිරීමේ දී පිහිටුවනු ලැබූ ප්‍රධාන සලකුණක්. මංතුමාගේ පිය උතුමා මේ Trig Point එක ලබා ගන්න ගිය සැටි පසු ලිපියකින් බලාපොරොත්තු වන්නකෝ. 

Tuesday, April 15, 2014

පිදුම

බුදුන් දහම් සඟුන් වැන්ද පළමුව මම ඹන්න
අාදර මගෙ දෙමව්පියන්ටත් වැන්දා මෙන්න
සිත නලියපු කාරණයක් කාලෙක සිට දන්න
තෙලිදිය විලසින් අාවා අත්පුඩියක් දෙන්න

අකුරු කරන සැටි අාදරයෙන් කියලා දීපූ
අකුරු වල බලෙන් ඉහලට යන මග පහදාපූ
මේ ලෝකෙට අාදරයෙන් බිහිකරලා හදපූ
දෙමාපියන් වෙත පුදනෙමි මා අැතිදැඩි කරපූ

සැමදාමත් අාදරයෙන් මා දිරිමත් කරන
සුරතල් මගෙ පුතණ්ඩියගෙ මුදු සිනාව රකින
නිරතුරුවම මන් එනතුරු මග බලාන සිටින
මා ප්‍රියදර හාමිනේව මතක් කරන්ටෝන



@@@@@@@@@@@@@@@@@@@@

රසවත් හරවත් අත්දැකීම් සමුදායක් ඔබත් සමග බෙදාහදා ගන්නටත්,
මාපියතුමා ගේ මිනින්දෝරු දිවියේ ලත් අතිදුර්ලභ ඉමිහිරි අත්දැකීම් බෙදාහදා ගන්නටත්
මෙතැන් සිට සයිබර් අවකාෂයේ සැරිසරමි.

තෙලිදිය බිදක් රස බැලීමට මයියොක්කා සමග පොලුත් රැගෙන එන ලෙස
ඔබ හට අාරාධනා කර සිටිමි.

(ගෙනාපු  මයියොක්කා සහ පොල් කමෙන්ටු කොටුවේ දමන්න.)